Gumbregan inggih menika salah satunggaling tradisi ingkang taksih kalastariaken wonten ing tlatah Gunungkidul salah satunggaling wonten ing kecamatan Semanu. Gumbregan menika awujud slametan saking para petani ingkang gadhah ingon-ingon arupi lembu kagem lembunipun, ingkang dipun anggep kewan ingkang saged mbiyantu manungsa awit saking tenaganipun, ugi saking dagingipun. Kanthi gumbregan, para petani ugi saged ngaturaken raos syukur dumatheng Gusti Allah awit saking peparinganipun, para petani saged kagungan ingon-ingon. Lembu ugi kewan ingkang anggadhahi regi ingkang inggil wonten ing pasar. Gumbregan biyasanipun kalaksanaken 8 sasi sepisan, wonten ing wuku Gumbreg. Kagem Gumbregan kathah ubarampe ingkang kedah dipun siapaken ing antawisipun, kupat, sekul jadah, pulo, maneka warna pala kapendhem kados uwi, gembili, berut, lan sanesipun. 

Biyasanipun, para petani ingkang kagungan lembu, nyiapaken ubarampe sedinten sakderengipun gumbreg, kados damel kupat, sekul jadah, pulo, lan maneka warna pala kapendhem. Ubarampe menika mujudaken kathahipun menapa ingkang sampun dipun paringaken dhening Gusti Allah dhumateng para petani. Wonten ing dinten gumbregipun, para petani ingkang kagungan lembu, banjur paring dhaharan ingkang sampun dipun damel dhumateng tiyang ingkang mboten gadhah lembu, utawi tiyang ingkang mboten deduwen. Peparingan menika mujudaken raos syukur kanthi paring sodakoh dhateng tiyang sanes. Sak sampunipun menika, para petani kumpul wonten ing bale utawi dalemipun RT, lan wonten ing mriku, para petani mbeta ubarampe ingkang sampun dipun damel, banjur para petani dipun pimpin dhening kaum, utawi  pinisepuhipun padha dedonga marang gusti kagem para leluhur ingkang sampun seda ingkang sampun paring pitedhah, ugi kagem kewan sarta hasil buminipun, mugi-mugi kewan ingkang dipun ingu saged ngreda utawi manak kathah. Ugi para petani nyuwun supadhos kewan-kewanipun sehat waras, saengga kewan kados lembu saged mbiyantu petani, kangge nggarap sawahipun. Sak sampunipun kendurinan, banjur ubarampe ingkang dipun beta menika dipun kumpulaken lan dipun dhahar sesarengan.

Sak sampunipun menika, para petani banjur ngurus kewanipun. Lembu-lembu padha dipun pakani kathul, ingkang sampun dipun campur toya, ugi dipun pakani ubarampe gumbreg wau kados kupat, uwi, gembili, ganyong, lan sanesipun. Kanthi mangan ubarampe ingkang sampun dipun dongaaken, mugi-mugi kewan menika saged dados ingkang dipun karepaken dhening petani. -frm